Saimir Bajo

[Brari]

Një regjisor shqiptar në televizionin shtetëror të Çekisë

Saimir Bajo një pasaportë në ekranin çek


--------------------------------------------------------------------------------

mi.ho.

Aspak i lehtë nuk ka qenë depërtimi nëpër rrugët e botës për regjisorin e ri Saimir Bajo. Me dëshirë e vullnet, sigurisht dhe me pak fat, ai sot është një nga regjisorët e televizionit shtetëror të Republikës Çeke. I diplomuar fillimisht në shkollën e televizionit "Produzioni Didattiche Moderne" në Milano të Italisë ai arrin të konkurojë dhe të fitojë njëkohësisht edhe një tjetër diplomë këtë herë në Akademinë e Filmit dhe Televizionit FAMU, në Pragë të Çekisë.

Me këtë background shkollimi Saimir Bajo arrin të plotësojë kurikulumin e tij jo vetëm si aktor, por dhe si skenarist e regjisor i disa filmave, një pjesë e të cilëve dokumentarë. Ndër këto filma përmendim: "Kokoshat", "Ciganët e Shqipërisë", "Gjashtë histori shqiptare", "Qyteti i gurtë", "Kosova e lirë" etj. Si aktor dhe si bashkëpunëtor në filmat "Rolling", "The good father", "The War", "Prague stores", "Dune", "The Drag" etj.

Por jo vetëm kaq. Regjisori i ri Saimir Bajo nuk harron se vendi nga ai vjen quhet Shqipëri. Prandaj ai është përpjekur t'ua tregojë këtë vend edhe njerëzve me të cilët ai jeton e punon. Për këtë, krahas shumë filmave të tjerë, ai ka realizuar dhe një dokumentar me titullin "Shqipëria nën krahët e shqiponjës". Si regjisor i telvizionit shtetëror çek regjisori Bajo ka arritur ta përfshijë këtë film në një nga ciklet më të ndjekur të këtij televizioni, në atë me titull "Cestomania" (Udhëtimi). "Duke qenë një pasaportë për Shqipërinë, thotë regjisori Bajo, kam dashur që në këtë film të jem sa më realist, për të pasqyruar gjithë historinë e popullit tim (që për mua është ndër më të vjetrit në Evropë). Pa harruar kontradiksionet e kaluara në periudhën e tranzicionit". Filmi dokumentar prej 30 minutash "Shqipëria në krahët e shqiponjës" përkufizohet nga Bajo si një udhëtim nga antikiteti shqiptar në modernitetet për të përfunduar në atë çka përbën vërtet vlerë të këtij vendi. Për ta realizuar këtë regjisori e ka nisur dokumentarin me qytetin historik të Krujës, pikërisht me Skënderbeun. Më pas ai vijon me traditën duke arritur deri tek moderniteti i përfaqësuar nga kryeqyteti, Tirana. Kjo e fundit është simboli i luksit, lojrave të fatit e deri tek lojrat piramidale. Një element të bukur të këtij luksi, apo më saktë të hershmërisë së tij, regjisori Bajo e ka kërkuar tek dhurata që Hitleri i bëri Mbretit Zog në dasmën e tij. Që në atë kohë Shqipëria pati "Mercedesin" e saj të parë, për të ardhur deri tek "Mercedesët" e kohëve të fundit. Një fenomen që regjisori vë në dukje gjatë filmit është bujaria e njerëzve që ai takon gjatë udhëtimit për realizimin e këtij dokumentari. Duke zbuluar kështu një nga virtytet e shqiptarit.

-----------
gaz.shqip.

[Albo]

Gjirokastër, filmi “violinisti” rikthen në vendlindje regjisorin Saimir Bajo



Në kinemanë e qytetit të Gjirokastrës është shfaqur premiera e filmit “Violinisti” i regjisorit Sajmir Bajo. Autori i filmit rikthehet në vendlindje me një prodhim kinematografik të arrirë, sa universal aq edhe autobiografik. Në qendër të filmit janë vitet e fëmijërisë që vetë regjisori i ka kaluar në qytetin e gurtë të ndërthurura me elementë artistikë

“Filmi “Violinisti” është një film memorie, janë copëza nga jeta ime kur kam qenë fëmijë i vogël 5-6 vjeç dhe shkoja në Shkollën e Muzikës, është e bazuar në historinë time personale dhe të familjes Bajo,por nuk është film autobiografik, është film artistik i dramatizuar që do të thotë gjithë personazhet por edhe ngjarja ndonëse janë pothuaj 90% të vërteta unë i kam dramatizuar që të jetë një film artistik”

Humbja e pafajësisë, dashuria platonike, nuk e çojnë në dramë personazhin kryesor, këtë fëmijë 6-7 vjeçar por violinisti i vogël gjen një dashuri akoma më të madhe që është kinemaja. Për regjisorin filmi me të gjitha elementët e realizimit të tij i përket prurjeve të reja në kinematografinë shqiptare.

“Ky është një film autentik shqiptar, kjo është e veçanta sepse të gjitha elementët e filmit që nga skenari,ngjarja, personazhet, atmosfera e magjishme e Gjirokastrës është një film i cili ka një atmosferë fantastike, do të thoja që është një film në të gjitha elementët qoftë te muzika,qoftë tek kamera, qoftë tek aktrimi, qoftë tek mënyra e të treguarit”

Përgjatë këtij aktiviteti iu akordua titulli “Qytetar Nderi i Gjirokastrës” artistit Arben Bajo, i cili u nda nga jeta në moshën 52-vjeçare duke lënë pas një krijimtari të pasur në artet figurative.

Balkanweb